Олоҥхо диэн аан дойду хайдах айыллыбытын, олох үөскээбитин, саха омук хайдах сайдыбытын, олоҕун-дьаһаҕын, майгытын-сигилитин, өйүн-санаатын, айылҕа модун күүһүн кэпсиир сүдү айымньы. Олоҥхо тыла саха омук бастыҥ баайа, кэрэ киэргэлэ, өйүн сүрэҕин үгүс үйэлээх албан айымньыта.
Кини — норуот күндү кылаата, норуот муудараһын, этэр тылын эгэлгэтин муспут баай айымньы. Олоҥхо норуот тылынан уус-уран айымньытын муҥутуур чыпчаалынан буолар. Кини жанр өттүнэн саамай уустук тутуллаах, ураты көрүҥнээх айымньы.
Сэтинньи 25 күнүттэн 29 күнүгэр диэри Олоҥхо Декадата буолла.
Саһыл орто оскуолатыгар алын сүһүөх үөрэнээччилэригэр анаан бэсиэдэ уонна викторина ыытыллынна. Олохтоох библиотекаҕа орто сүһүөх үөрэнээччилэригэр анаан кинигэ быыстапкатынан «Олоҥхо дойдутунан айан» диэн ааттаах викторина ыытыллынна. Олоҥхо темалаах НПК кыттааччыларыгар, улахан сүһүөх үөрэнээччилэригэр, кинигэ быыстапката улахан көмө буолла.
Үөрэнээччилэр актыыбынайдык кыттыыны ыланнар, билиилэрин кэҥэттилэр.
Саха норуота бачча улахан барҕа баайдааҕынан киэҥ туттуохтаах!
Айталина Елизарова
