Саха омук тыла баай,
кэрэ, хомо5ой,
байа — барҕара турар,
сайдар үүнэр кэскиллээх.
Саха Сирин бастакы Президена М.Е. Николаев 1996 сыл олунньу 9 күнүнээҕи «Төрөөбүт тыл уонна сурук-бичик күнүн биллэрии туһунан» ыйааҕыгар олоҕуран, С.А. Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ. Бу күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах.
Бу күнү бэлиэтии олохтоох библиотека «Кэскилчээнэ» оҕо уһуйааныгар олунньу 13 күнүгэр ыалдьыттаата. Манна оҕолорго С.А.Новгородов олоҕун туһунан бэсиэдэлээтэ. Семен Андреевич 1917 сыллаахха оҥорбут алпаабытын кытта билистилэр, уонна сахалыы бастакы букубаар “Сахалыы сурук – бичик” ааттаах эбит диэн биллилэр.
Бэсиэдэ кэннэ о5олор “МАСИГРА” диэн маһынан оҥоһуллубут сахалыы араас оонньууларынан билсэн-көрөн оонньоотулар, сэргээтилэр.
Олунньу 14 күнүгэр Саһыл орто оскуолатын библиотекатын кытта алын кылаас сүһүөх оҕолоругар анаан бэсиэдэ, викторина ыытыллынна. Манна оҕолорго С.А. Новгородов олоҕун туһунан бэсиэдэ ыытыллынна, ол кэннэ тугу билбиттэрин — өйдөөбүттэрин бэрэбиэркэлээн викторина буолла. Оҕолор төһө өс хоһоонун билэллэрин көрдүбүт, ребус таайтарыытын оонньоттубут, синиэним тыллары буллулар, нууччаттан сахалыы тылбаастаатылар.
Тыл — киһи айбыт биир эриэккэс көстүүтэ. Киһи төрөөбүт тылын төһө дириҥник билэр да, соччонон кинини ытыктыыр.
Библиотекарь Айталина Елизарова
